Залуушуулай таhагай эдэбхи үүсхэлнүүд ехэтэ hайшаагдаа

Хэжэнгэ нютагтамнай Сагаалганай найр наадан яhала эмхитэйгээр үнгэржэ, хүн зон олоороо сугларжа, эбтэй эетэйгээр коллектив бүхэнэйнгөө түлөө халуунаар альгаяа ташан баяраа мэдүүлhэн байнад.

Могсохон нютагhаа гарбалтай, соелой таhагта режиссер боложо ерэhэн Эдуард Ванзатовай хүтэлбэри доро табигдаhан еохор наадан олонхи зондо ехэтэ hайхашаагдаа. Жэл бүхэндэ нэгэл адляар табигдажал байдаг нааданиие түхэл маягаарнь шэнэлээд табижархихадань, тад ондоо боложо, нюдэ хужарлуулма баяр болоодхео.

Еохор нааданай hүүлдэ илагшадые диплом болон шангуудаар урмашуулhанайнь удаа Залуушуулай таhагайхид (хүтэлб. Ц.С.Цыденжапов) урда үеынгөө үбгэ эсэгэнэр мэтээр мори шаргадаа hуужа, буряад малгай дэгэлээ үмдөөд, арад зоноо ород, буряад хэлэн дээрэ амаршалаа, хүбүүд, басагадые хэдэн команданууд боложо, валенкаар мини-футбол наадахыень уряалаа.

Хоер бартаануудые табижа, командануудай гэшүүдые бэшэтэрнь, валенкануудые суглуулжа наадатарнь эдэбхи үүсхэлтэй залуушуул «Саhата тир», городки болон «Баханын оройдо хүрэтэр» гэhэн мүрысөөнүүдые үнгэргэжэ, олон тоото үхибүүдые баярлуулhан байха юм.

«Саhата тир» гэжэ мүрысөөндэ хабаадагшад эндэ тэндэhээ хатуухан саhа суглуулжа, тээ саана табяатай шангуудаа («Спрайт» г.м. банкатай уудаг унданууд) саhануудаараа тудажа, бэлэгүүдтэ хүртөө.

Городки нааданда баhал тээ саанахана табяатай банкатай уудаг ундануудые нэгэ модохоноор тудажа, мэргэн бологшо хүбүүд, басагадта бэлэгүүд барюулагдаа.

Эдэ хоер наадануудта эдэбхи ехэтэйгээр хабаадажа, олон тоото амтатай ундануудта хүртэhэн эдир барилдаашан, 1-дэхи КСШ-гай 6-дахи «г» классай hурагша Руслан Хакимовые дүрэ-зурагта харанат.

«Баханын оройдо хүрэтэр» аhалдаха яhала олон шамбайшуул байгаа. Харин тэдээн сооhоо эрхимүүдынь гэхэдэ, лицейн 11-дэхи классай hурагша Баатар Урбазаев ба БРТСиГХ-гай курсант Женя Шойдуков гэгшэд мүнгэн шангуудта хүртөө.

Тиигэhээр байтараа 6-7 команданууд сугларжа, валенката мини-футболоор түрүү hуури эзэлхын түлөө мүрысэбэ. Команда бүхэнэйнь бүридэлдэ 4 хүбүүд ба 2 басагад ороо. Валенкануудые углаhан наадагшадые харахада ехэ hонин байгаа, юуб гэхэдэ, саhаар хушагдаhан талмай дээрэ улаан, ногоон үнгэтэй майкануудые үмдэhэн хүбүүд, басагад бүмбэгэеэ үдьхэлхэ бүхэндөө хальтираад лэ тарайшаха юм.

Энэ мүрысөөндэ «Юность» гэhэн команда – 1-дэхи, нютагай hурагшад болон оюутадhаа бүридэhэн «Залуушуул» гэжэ команда 2-дохи hуурида гараба. Тиихэдэ «Залуу мэргэжэлтэд» гэжэ нэрлэгдэhэн команда 3-дахи hуури эзэлээ. Тус командын бүридэлдэ нютагтаа хүдэлжэ байhан хүбүүд, басагад шадалаа туршаа. ВСГТУ-гай оюутан, hур харбалгаар мастерта кандидат Арюна Гунзынова «Эрхим добтологшо», Дарима Галданова - «Эрхим хамгаалагша», Артур Данзанов «Эрхим вратарь» гэhэн шангуудта хүртэбэд.

Аймагай захиргаанай Залуу-шуулай, физкультура болон спортын талаар таhагай эдэбхитэй мэргэжэлтэдые Цырен Цыденжапов, Ринчин-Ханда Тугултурова ба тэдэнэртэ үнэн зүрхэнhөө туhалhан зонуудые нэрлэхэдэ, Артур Ганжитов, Зорик Дубшанов, Эдуард Ванзатов болон бусад.

Иимэ залуу, урагшаа hанаатай, эдэбхи ехэтэй хүбүүд, басагадай олоор бидэнэй дунда бии боложо байхада, дороhоо ургажа ябаhан үхибyyднай архи, тамхинhаа холодон, зүб бурууе ойлгожо, сэдьхэлээ арюунаар абажа, муу харгыда оронгүй, hайн тээшээ дабшан ябахань дамжаггүй!

Бато-Цырен ДУГАРОВ.