Һайн хүнүүд тухай

Сагаан hанаатай багша

Галина Георгиевна Балданова хадаа урагшаа hанаатай, урма зоригтой, эдэбхи үүсхэл ехэтэй, ажабайдалдаа, ажалдаа амжалтатай багша. Һанаhанаа бэелүүлдэг, үнэн сэхэ зантай, үсэд нэтэрүү, баян сэдьхэлтэй байhыень хүн зон үндэрөөр сэгнэдэг юм.

Тэрэ Эрхүүгэй областиин Нүхэдэй аймагай Целинный тосхондо Ильинтэнэй багшанарай бүлэдэ 4 үхибүүдэйнь эгээ ехэ үринь боложо түрэhэн намтартай. 1978 ондо Улаан-Yдын багшанарай училищи эрхимээр дүүргээд, Хэжэнгын аймагта багшалхаяа эльгээгдэжэ, манай Ородой-Адагай дунда hургуулида ажалайнгаа намтар эхилhэн. Эндэ мүн лэ багшаар хүдэлжэ байhан залуухан Дашицырен хүбүүнтэй танилсажа, хуби заяагаа нэгэдүүлжэ, айл бүлэ болоhон юм.

Галина Георгиевна хадаа номгон даруу зантай, сагаан сэдьхэлтэй, зондо hанаагаа зобожо, ходо туhалха гэжэ ябадаг, hайн үгөөр хүниие дэмжэжэ байдаг хүн юм. Тосхон соогоо, hургуулидаа ниитын хэрэгтэ оролсожол ябадаг, уран гартай, сүлөөтэй сагтаа оёхошье, нэхэхэшье дуратай, айл аймагтаа, нүхэдэйнгөө дүхэриг соо хүндэтэй, хэжэ ябаhан ажалдаа бэрхэ, шабинартаа ханалгатайгаар хандадаг, эрхим багшанарай нэгэн болоно. Шабинараа элдэб конкурснуудта бэлдэдэг.

2007 оной аймагай Сагаа hарын Дангина-Гэсэрэй мүрысөөндэ 3-дахи классай шаби Саша Рантаровань эдир дангинануудай дунда II hуури эзэлээ. Шабинарынь мүн лэ эрдэмэй-практическа конференцинүүдтэ хабаададаг. 2008 ондо аймагай эрдэмэй-практическа конференцидэ 4-дэхи классай шаби Аяна Намсараевань I hуурида гаража, Улаан-Yдэ ошожо 10 эрхимүүдэй дунда урмашуулгын шанда хүртэhэн байдаг.

Галина   Георгиевна   олон   грамота-нуудтай, hургуулиингаа, соёлой таhагай, райОО-гой, мүн Россин Федерациин hуралсалай болон эрдэм ухаанай профсоюзай хүдэлмэрилэгшэдэй Хүндэлэлэй грамотаар шагнагданхай.

Наhанайнгаа нүхэр Дашицырен Базаровичтай гурбан бэрхэ хүбүүдтэй, хоёр hайхан басагадтай, табан аша зээнэртэй болонхой. Yхибүүдэйнь ехэ болохо Бата хүбүүниинь ехэ hайхан, гоё хоолойтой, нютагтаа, мүн аймаг соогоо, аймагhаа гадууршье мэдээжэ дууша хүбүүдэй нэгэн юм. Соёлой ажалтай. Хоёрдохи үри - Дарима басаганиинь дээдэ hургуулитай, Улаан-Yдэдэ пенсионно жасын управленидэ ажалтай, мүнөө үень Түнхэндөө, үхибүүнтэеэ гэртээ hууна, тэндэhээ нүхэртэй. Базар хүбүүниинь эхэ эсэгэдээ адли, баhал багшын мэргэжэл шэлэнхэй. Гэр бүлэтэеэ Улаан-Yдэдэ ажалланад. Соня басаганиинь ВСГАКИ дүүргэнхэй. Одхон Баатар хүбүүн ВСГАКИ-да 4-дэхи курсын оюутан юм. Yхибүүдээ эрхим hайнаар хүмүүжүүлжэ, бүлтыень дээдэ hургуулитай болгожо байhан, буряад зоной үгөөр, «хүлынь дүрөөдэ, гарынь ганзагада» хүргэhэн, бага Баатарhаа бэшыень айл болгоhон, ажалша бэрхэ, алишье талаараа баян, айл аймагтаа ехэ хүндэтэй, түhатай иимэ ехэ зохид айл манай Ородой-Адагта ажаhуудаг.

Галина Георгиевнае гарахаяа байhан Шэнэ жэлээр халуунаар амаршалаад, элүүр энхэ, гэр бүлэдөө золтой жаргалтай, хэжэ байhан ажалдаа үшөө ехэ амжалтануудые туйлажа, ута наhатай, удаан жаргалтай ябахыень хүсэе.

Ц. БАЗАРДАШИЕВА, ажалай ветеран