|
Манда бэшэнэ
Cайн байна, Хэжэнгэ нютагайхид!
Хонгор hайхан Хори нютагhаа,
Хори нютагай хүн зонhоо
Сагаан hараар, Сагаалганаар,
Сэдьхэлэй мэндые хүргэнэб.
Сагаан hараар, Сагаалганаар
Yетэн нyхэдөө, түрэл гаралаа
Амаршалан доро дохиноб,
Амгалан тайбан, жаргалтай
Ажал дээрээ алдартай
Ажаhуухыетнай хүсэнэб.
Хэжэнгын Ородой-Адагай дунда hургуулиин түрүү багша Лайжа-Ханда Жимбеевна Борохитовада зорюулжа бэшэhэн материалаа танай редакцида эльгээхыем зүбшөөгыт. Ушарынь гэхэдэ, энэ бэрхэ, элдэб янзын олон хэмжээ ябуулгануудта саг үргэлжэ эдэбхитэйгээр хабаадажа байдаг урагшаа hанаатай, сог залитай багша тухай бэшэнгүй байхын аргагүй. Эльгээhэн материалыем анхаралтайгаар уншажа шэнжэлээд, нютагайнгаа газетэдэ гаргыт даа гэжэ үнэн зүрхэнhөө гуйха байнаб.
Өөр тухайгаа хэлэбэл, Хэжэнгэ нютагhаа уг гарбалтай, бага сага саарhа эреэлээд туршадаг багша, мүнөө ажалай ветеран болонхой. Хори нютагта ажаhуудаг Цырен-Ханда Очирова (Хубитуева) болоноб даа.
Түүрээлгэеэ энэ мэтээр дүүргэхэм ха даа.
Зай, баяртай! Сагаалганай амар мэндые үшөө дахин хүргэн үлэгшэ Цырен-Ханда мүн болоно.
Амжалтааршни амаршалнаб
Урда холын түүхэтэй
Улад зоной мүргэлтэй
Наран-Хадын энгэртэ
Намжаа hайхан нютаг байха…
…Худанай Yртөө тоонтотой
Хонгор үхибүүн хаhашни
Наран-Эжыhээ үршөөлтэй
Һодо жэгүүртэй байба гү?..
…Ородой-Адаг hууринда
Одоол батаар түбхинэбэш.
Одото замшни нээгдэжэ,
Олоной түрүү гэгдэбэш.
Засаг түрын газарhаа
Заабол шамай амаршалhан
Эрхим ажалайш үрэ дүнгүүд
Олон тоото грамотанууд.
Багшын хүндэхэн ажалда
Бүхы наhаа зорюулааш.
Элдэб наhанай үхибүүдтэ
Эрдэм мэдэсэ олгуулааш.
…«Айрагай нааданай» дүхэриг соо
Өөрын гаргаhан зүргэтэйш.
Хэдэн зүйлэй наадан соо
Хододоо түрүүлнэш амаршалнаб.
Республикын хэмжээнэй мүрысөөндэ
«Буряадай багшанарай элитэдэ»
Баhал шимнай түрүүлбэш,
Баяр, омогорхол асарбаш.
«Ерээдүй тээшэ алхам» -
Эрдэм-шэнжэлэлгын хуралдаан.
Эндэ баhал шалгарбаш,
Эрхим шабинар магтуулба.
Аймаг дотор үнгэрhэн
Багшанарай инновациин мүрысөөндэ
Хоёрдохи шатын диплом
Бэлиг талаангыш гэршэлнэ.
…Сэнхир Шэлэнтээр бударhаар,
Шэжэр мүнгэ шэдэлhээр,
Шэнэ бодол түрүүлhээр
Сагаалган буужа ерэбэл даа.
Сагаан hараар, Сагаалганаар
Сагай байдал hайжарhай.
Сагаан hараар, Сагаалганаар
Сэдьхэл зоной тэгшэрhэй.
Yетэн нүхэдэйнгөө, гэр бүлынгөө
Уни бутарма дүхэриг соо
Сагаан hараар, Сагаалганаа
Шогтой зугаатай угтыш даа,
Лайжа-Ханда Жимбеевна!
|
