Шэн зоригтой, бэлиг талаантай байhан

2000 оной намар, Ирина Николаевна Дарижаповагай хүтэлбэри доро, Хэжэнгын аймагай hуралсалай таhагта ажаллажа эхилээ hэм. Суг хамта гурбан жэлэй хугасаа соо хүдэлхэдөө, Ирина Николаевнагай шэн зоригтойе, эрмэлзэл ехэтэйе, хэлэhэн үгэдөө хүрэдэг, хүн зонтой дүтөөр харилсаха шадабаритай, ударидахадаа ульhан, абьяас, бэлиг талаантай байhыень харааб.

Гүрэн дотор hуралсалай hалбариин хубилагдажа байгаа үедэ, үндэhэтэнэй «hуралсал» гэhэн проектын бэелүүлэгдэжэ байhан сагта аргагүй ехэ оролдолго гаргажа, Хэжэнгын аймагай hуралсалай таhагые хүгжэлтын шэнэ шатада гаргажа hалбаруулhан намтартай. Эдэбхитэй хүтэлбэри доронь аймагаймнай олон hургуулинууд Россин hургуулинуудай дунда мүрысөөндэ хабаадажа, мүнгэн шанда хүртөө, энэнь хадаа байра байдалаа хангалгын ба хүгжэлгын талаар ехэ нүлөө үгөө, эрмэлзэл ехэтэй багшанар урмашуулагдаа.

Ургажа ябаа залуу үетэнэй сүлөө сагые hонирхолтой, үрэжэлтэй болгохын тула анхаралаа табижа, hургуулинуудта олон кружок, секцинүүдые нээлгэhэн. Мүнөө үедэ залуушуулай туйлажа ябаhан илалтанууд Ирина Николаевнагай ябуулалгын хэрэг бүтээлнүүдэй дүн боложо, тобойн гараад ерэнэ гэхэдэ, алдуу болохогүй.

Ирина Николаевнагай түрэл хэлэндээ, түрэл нютагтаа дуратай байhаниинь мэдээжэ. Түрэлхи хэлэеэ заахадаа, үндэhэн арадайнгаа соёлтой, ёhо заншалтай, Эхэ орондоо дуратай хүнүүдые хүмүүжүүлхэ ёhотойбди, үхибүүдтэ заабол түрэлхи хэлыень хүүгэдэй сэсэрлигhээ эхилжэ, эхин hургуулида үзүүлхэ, оршон тойронхи ажабайдалда буряад хэлэ дэлгэрүүлгын ажал ябуулха түсэб табигша hэн.

Ж. Цыдендамбаев,

Хэжэнгын интернат-hургуулиин буряад хэлэнэй