Мyрысөөн

“Шабинуудаараа омогорхомоор байгаа”

Апрелиин 10-да Ивалгын юрэнхы hуралсалай дунда hургуулида «Буряад хэлэн баян даа!» гэhэн республиканска фестиваль-олимпиада хоёрдохи жэлээ үнгэргэгдэбэ. Тус олимпиада буряад бэшэ, ондоо яһатанай эрдэм мэдэсэ  элирүүлхэ,  буряад  хэлэ  хэр зэргэ мэдэдэгыень, буряадаар дуугардагыень шалгахаһаа гадна, элдэб hонин конкурснуудые yнгэргэһэн байна.

«Толерантность» гэһэн темээр хабаадагшад багахан элидхэлнүүдые хэhэн, үреэл хэлэһэн, ородһоо буряадта текстнүүдые оршуулhан, шүлэг, дуу, хатар гүйсэдхэжэ, бэлиг шадабарияа харуулаа.

Хамтадаа элдэб аймагуудhаа 80-аад зон  хабаадаа.  Тэдэнэр  наһанайнгаа илгаагаар  хоёр бүлэг боложо хубаараад, мүрысөө. Манай Дээдэ-Хэжэнгын hургуулиин 11-дэхи классай hурагша Таня Николаева информатикын багша В.Г. Верхушина хоёр хабаадажа, hайнаар хабаадаад, амжалтатай бусажа ерээ. Ехэшүүлэй дунда Валентина Галактионовна хабаадажа, шангай 3-дахи hуури эзэлээд, грамота,  «Нокиа» түхэлэй cотово телефон, флэшкэ бэлэгүүдтэ хүртөө. Харин Танимнай урмашуулгын hуурида гаража,  «Шүлэг эрхимээр уншагша» гэhэн тусхай шанда хүртөөд, мүн баhа флэшкэ, дүрэ-зурагай альбом  бэлэгүүдээр шагнагдаа.

Нёдондо жэл энэ «Буряад хэлэн баян даа» гэhэн фестиваль-олимпиадада түрүү hуури эзэлжэ шалгарhан манай hургуулиин hурагша, мүнөө Буряадай гүрэнэй университедэй оюутан Виталий Нестеров нээлгын баяр ёhололдо сэбэр буряадаар үгэ хэлэжэ, hүүлдэнь шүлэг уншажа, сугларагшадые ехэтэ баярлуулаа. Yшөө тиихэдэ Буряадай hуралсалай болон эрдэм ухаанай министерствын мэргэжэлтэд, Буряадай Yндэhэтэнэй 1-дэхи лицей-интернадай буряад хэлэнэй багшанар, «Буряад үнэн», «Бэлиг» хэблэлнүүдэй байшанай түлөөлэгшэдтэй хамта жюрин хүнгэн бэшэ уялга даажа абаа.     

«Шабяараа омогорхомоор байгаа».

Иимэ hайхан hайндэр  Буряадай багшанарай колледжын буряад хэлэ бэшэгэй факультет (декан Л.Д. Жалсанова), Ивалгын hургуули (директор А.Н. Зарубин) г.м. үүсхэлээр дээдэ хэмжээндэ үнгэргэгдэбэ. Түрэл хэлэеэ гансашье буряад зоной хоорондо саашань хүгжөөхэ бэшэ, харин манай Буряад орон дотор ажаhууhан элдэб олон яhатанда дамжуулан танилсуулха гэhэн ехэл hайн хэрэг хэгдэнэ. Хойто жэл тус олимпиада региональна удха шанартай боложо,  Эрхүү, Агын тойрогой ондоо яhатан хабаадаха аргатай болохо гэжэ тэмдэглэгдээ. 

Р. БУДАЖАПОВА,