Һайндэрэй сууряан

Багшанарай Һайндэр - эдэрмэгтэ

Октябриин 1-нэй yдэр Дээдэ-Хэжэнгын Соёлой байшан соо хүн зон олоороо сугларанхай, ехэ хүлгөөтэй байба. Юуб гэхэдэ, Багшанарай жэлдэ ба заншалта һайндэртэ зорюулагдаһан гоё концерт наадан, амаршалганууд зэдэлбэ. Энэ һайхан хэмжээ ябуулганууд нютагай Соёлой байшангай дарга Цыбжидма Санжимитыповна Агбановагай ударидалга доро үнгэргэгдөө. Ордон соо хуу шэнээр заһабарилга хэгдэнхэй, һаруул, сэбэр. Фойе соо Дээдэ-Хэжэн-гын багшанар тухай ехэ һонирхолтой выставочна материал Эдэрмэгэй номой сангай библиотекарь Оргамал Ринчиновна Рыгдылонова дэлгэжэ, зоной нюдэ хужарлуулаа. Энэ һайндэртэ наһанайнгаа амаралтада гаранхай, бyхы наһаяа эдир хүүгэдтэ зорюулһан багшын ажалай ветеранууд уригдаһан байна. Амаршалгын дулаан үгэнүүдые нютагай гулваа Булат Цыденович Бочиктуев, Дээдэ-Хэжэнгын дунда һургуулиин директор Артур Доржибалович Очиров, һуралсалай талаар директорэй орлогшо Сэсэгма Николаевна Шойропова, наһанайнгаа амаралтада гаратараа олон жэлэй туршада хүдэлһэн Гэрэлма Цынденовна Цынденова гэгшэд хэлэһэн байна. Гоё һайхан концерт наада Соёлой байшангайхид, һургуулиин шабинар, Эдэрмэгэй хүгжэмэй һургуулиин һурагшад табяа. Мүн Саяна ба Сарана Дугдановануудай хонгёо хоолой зэдэлжэ, халуун альга ташалганда хүртөө. Ехэ һонирхолтой, урда сагта манай һургуулида хүдэлһэн багшанар тухай видео-презентаци харуулагдаһан байна. Тyгэсхэлдэнь багшын ажалай ветерануудта, мүнөө хүдэлжэ байһан багшанарта ба һургуулиин ажалшадта хүндэлэлэй грамотанууд, бэлэг сэлэгүүд барюулагдаа, сайлалган хэгдээ. Энэ һайндэртэ мүнгэнэй талаар ехэ туһа хyргэһэн Дондит Дамдинович Дагбаев, Дансаран Дагбаевич Дамдинов, Булат Цыденович Бочиктуев, Дулмажап Сташкиновна Алганаева гэгшэдтэ халуун баярые хүргэе!

Р. Будажапова, Дээдэ-Хэжэнгын дунда hургуулиин буряад хэлэнэй багша