|
Абитуриент-2011
YНДЭHЭТЭНЭЙ ГУМАНИТАРНА ИНСТИТУДТА ЖУРНАЛИСТНУУДЫЕ ҺУРГАХАНЬ
Буряадай гүрэнэй университедэй Yндэhэтэнэй гуманитарна институдта жэл бyри шэнэ мэргэжэлнүүд нээгдэдэг гээшэ. Ерэхэ hуралсалай жэлдэ эндэ «Журналистика» гэhэн шэглэлээр «Буряад телевидени, радио-дамжуулга» гэhэн мэргэжэлээр оюутад абтаха. Эндэ мэргэжэлэй, мүн тусхай дисциплинэнүүдые тус институдай кафедрануудай, хэлэ бэшэгэй факультедэй журналистикын кафедрын багшанар зааха юм. Университедэй хэлэ бэшэгэй факультедтэ журналистикын таhаг нээгдэhээр хэдэн жэл болоо. Эндэ hуража гараhан залуушуул радио, телевиденидэ имагтал ород хэлэн дээрэ дамжуулгануудые бэлдэдэг мэргэжэлтэд болодог. Харин Yндэhэтэнэй гуманитарна институдта буряад хэлэн дээрэ радио, телевидениин дамжуулгануудые бэлдэхэ журналистнууд hураха болоно.
Эдэ мүн лэ газетэ, журналнуудташье хүдэлхэ аргатай. Юуб гэхэдэ, оюутад ород, буряад хэлэ бэшэгэй талаар дисциплинэнүүдые, юрэнхыдөө журналистикын бүхы асуудалнуудые шудалха. Гадна буряад хэлэн дээрэ зохёохы практикум, теле-радио дамжуулгануудые бэлдэлгэ, буряад хэлэн дээрэ бэшэгдэhэн текстнүүдые хэблэлдэ бэлдэлгэ, буряад газетын жанрнуудай стилистикын онсо шэнжэнүүд гэхэ мэтэ тусхай предмедүүд эндэ заагдаха. Мүн баhа оюутад түрэлхи хэлэн дээрээ hуралсалай газетэ гаргаха, радио-теле-дамжуулгануудые бэлдэхэ гэжэ түсэблэгдэнэ. Тиин дүрбэн жэлэй туршада оюутад hуража, «журналистикын бакалавр» гэhэн зэргэтэй боложо гараха байна.
Yндэhэтэнэй гуманитарна институдта түрэлхи хэлэн дээрэ бэшэдэг, дамжуулгануудые бэлдэдэг журналистнуудые бэлэдхэл үшөө 1991 онhоо эхилhэн юм. Оюутад «Филология (хэлэ бэшэг)» гэhэн гол мэргэжэлhээ гадна «Филологическое обеспечение журналистики» гэhэн нэмэлтэ мэргэжэлээр бэлэдхэл гарадаг hэн. Тиимэhээ республикын газетэ, журналнуудта, радио-телевиденидэ мүнөө үедэ хүдэлдэг журналистнуудай олонхинь эндэ hураhан байна. Нэрлэбэл, Лариса Доржеева, Галина Михайлова, Ольга Намдакова, Баяр Жигмитов, Светлана Жигжитова, Даша-Доржо Болотов, Эрдэни Раднаев, Дэжэд Мархадаева, Борис Балданов, Сарюуна Эрдынеева болон бусад. Эмхи зургаануудай хэблэлэй албанда Владимир дашинимаев амжалтатай ажаллана. Журна-листын мэргэжэлээр хүдэлжэ дүршөөд, гүрэнэй эмхи зургаануудта, мүн харюусалгата тушаалнуудта дэбжyyлэгдэhэн хүнүүдшье олон:
Республикын Президентын болон Правительствын хэблэлэй албанда хүдэлhэн, мүнөө Ахын аймагай захиргаанай толгойлогшын нэгэдэхи орлогшо Баяр Балданов, ФСБ-гэй харюусалгата хүдэлмэрилэгшэ Бата-Мyнхэ Балданов, Правительствын дэргэдэхи оршуулгын албанай мэргэжэлтэ Бадмажаб Гындынцыренов, Захааминай аймагай хүдөөгэй поселениин толгойлогшо Батажаргал Логинов, Хурамхаанай аймагай хүдөөгэй поселениин толгойлогшо Радна Ешонов болон бусад. Манда hураhан журналистнууд Усть-Ордын, Агын тойрогуудташье ажалладаг.
Yндэhэн хэлэн дээрэ бэшэхэ, теле-радио-дамжуулгануудые бэлдэхэ журналистнууд болохо хүсэлтэй hаа, манда ерэжэ hурахыетнай уринабди.
Л. БАЛДУЕВА,
Yндэhэтэнэй гуманитарна
институдай багша, хэлэ бэшэгэй эрдэмэй кандидат
|
