Сагаалган-2011

Хэжэнгынхидэй hайндэр

Улаан-Yдэдэ филармониин байшанда Хэжэнгэ нютагаархид сугларжа, Сагаалганай hайндэр тэмдэглэбэ.

Хэжэнгын дасанай шэрээтэ Гармажап-ламхай түрүүлэн ендэр дээрэ гаража, дасанай жиндагуудай зүгhөө нютагайхидаа амаршалаа. Бүгэдэ зоной амгалан байдалай түлөө уншалга бүтээгээ. Тиигээд Хэжэнгэ нютагаархидай эблэлэй түрүүлэгшэ Цыван Батодамбаевич Базаровта дэлэг бурхан бэлэг барюулаа. Ниислэл хотодо ажаhуудаг нютагаархиднай Хэжэнгын дасанай барилгада ехэ туhалжа, хандиб оруулжа байдаг гээшэ. Саашадаашье энэ буянта хэрэгтэ нютагаархидаа хандиб оруулжа байхыень уряалаад, бултанда ута наhатай, удаан жаргалтай ябахыень гармажап-ламхай хүсөө.

Удаань Россиин, Монголой соёлой габьяата ажал ябуулагша Гүнзэн-Норбо Цыренович Гунзынов тайзан дээрэ гаража, нютагайхидтаа энэ дэлхэй дээрэ үнэр баян, сайн сайхан ажаhуухыень хүсэбэ. Удаань Г-Н. Гунзынов Россиин габьяата артистнууд Саян болон Эржена Жамбаловтаниие тайзан дээрэ уриба. Тэдэ өөрынгөө ээлжээндэ Сагаан hараар эндэ сугларагшадые амаршалаа, hайн hайханиие хүсөө. Нютагайхидайнгаа зүгhөө «Россиин габьяата артист» гэhэн хүндэтэ нэрэ зэргэдэ hаяхан хүртэhэн тэдэнэртэ бэлэгтэйгээр хадагууд барюулагдаба.

Тэрэнэй удаа Саян Жамбаловай хүтэлбэрилдэг «Урагшаа!» гэhэн театр-студиин бэлигтэй хүбүүд, басагад гоё hайхан концерт наада харуулаа. Тэдэнэй дунда нютагаймнай хүбүүн Жаргал Цымпилов бэлиг шадабарияа харуулжа, сугларагшадые баясуулаа.

Концертын удаа Правительствын Түрүүлэгшын орлогшо Б.Г. Бальжиров, Арадай Хуралай депутат З.Н. Гатапов, Хэжэнгэ нютагаархидай эблэлэй түрүүлэгшэ Ц.Б. Базаров гэгшэд тайзан дээрэ уригдаа. Баир Бальжиров үнгэрhэн жэлдэ үнгэргэгдэhэн шухала хэмжээ ябуулгануудые тэмдэглээ. «Знатные люди кодуно-кижингинской долины» гэhэн ном хэблэгдэhэндэнь ехэ баярланаб, манай нютагые суурхуулжа ябаhан хүнүүд тухай бэшэгдэнхэй, иимэ ном хүн бүхэндэ байха ёhотой гэhэн hаналаа тэрэ мэдүүлээ.

Арадай Хуралай депутат Зоригто Гатапов хэжэнгынхидые Сагаан hараар амаршалаад, hанаhан, зориhон хэрэгтнай бүтэжэ байг гэжэ үреэбэ.

Хэжэнгэ нютагаархидай эблэлэй түрүүлэгшэ Цыван Батодамбаевич Базаров үнгэрhэн жэлдэ бүтээhэн хэрэгүүдээрээ тоособо. Загарайн аймагта 12 дугаар Хамба лама байhан Гуро Цыремпиловэй дурасхаалда зорюулагдажа бодхоогдоhон субаргада загарайнхид, хориинхид, яруунынхидhаа гадна, хэжэнгээрхин ехэ хубитаяа оруулаа гэжэ тэмдэглээ. Энээнhээ гадна үнгэрhэн жэлэй сентябрь hарада эблэлэй үүсхэлээр нютагай заhал эмхидхэгдэжэ бүтээгдэhэн байна гэбэ. Тэрэшэлэн аймагай хүдөө нютагуудаар теннисээр турнир эмхидхэжэ үнгэргэhэн тухай тэрэ хэлээ. Иигэжэ хото хyдooдэ ажаhуудаг нютагаархиднай харилсаатай, ходо уулзажа байдаг байна.

Хэжэнгэ нютагаархидай эблэлые байгуулгада ехэ үүргэ дүүргэhэн С.Ц. Цыреторов, тиихэдэ ажалай ветеран Д.Р. Банзаргашеев тайзан дээрэ уригдаа. Нютагаархидай эблэлэй эмхидхэгдэhээр 20 жэл болоо гэжэ Семен Цыдыпович Цыреторов хэлээ. Эдэ жэлнүүдтэ олон hайхан хэрэгүүд бүтээгдээ гэжэ тэрэ онсолон тэмдэглээ. Нютагаархидтаа энхэ тайбан, hайн hуухыень хүсөө. Харин Д.Р. Банзаргашеев үгэ хэлэхэдээ, залуушуул олон болонхой, эндэшье залуу үетэн олон байна гэжэ ажаглаа. Тиигээд залуу-шуулда hайнаар хүдэлжэ, эхэ нютагаа бадаруулан хүгжөөжэ ябахыень үреэбэ. Эдэ хоёр үндэр наhатанда нютагай эблэлэй зүгhөө хүхэ номин хадаг бэлэгтэйгээр барюулагдаа.

Сагаалганай найрые Хэжэнгэ нютагай уран бэлигтэнэй концерт-наадан шэмэглээ. Тиихэдэ аймагай нютаг бүхэнhөө уг гарбалтай, үнгэрhэн жэлдэ хүндэтэ нэрэ зэргэнүүдтэ хүртэhэн, ажал хүдэлмэридөө шалгарhан хүнүүдтэ Сагаалганай hайндэрөөр дашарамдуулан, нютагаархидынь бэлэг сэлэгyyдые барюулаа.

Э. ДАМБАЕВА.

(«Буряад үнэн-Дүхэриг»).