Дулаахан үдэшэ...

Дулаахан үдэшэ газаамни

Дурлаhан хүбүүн хyлеэнхэй.

Дуугайхан баряад гарhаамни

Дүмүүхэн дүнгэн хүтэлэнхэй.

Түрүүшын дуранай зүргэ

Түмэн мүшэдөөр зурынхай.

Хүйтэн hарын дүрсэ

Халуун дуранhаа хайланхай.

Худанайм эрьеын хуhад

Хүзүүдээд намай шэбэнэнхэй.

Ханилсам хэлэжэ ядаад

Хажуудань аалихан нэнгэнхэй.

Дуранай hайхан үгэнүүдые

Дуулахаа дайда хүлеэнхэй.

Дуураhан талын сэсэгые

Дулаахан hэбшээ эльбэнхэй.

Шара тала hажанги

Шубууд булта замханхай.

Шаляа горхон аалиданги

«Шэхээ табин» шагнанхай.

Дуугай хажуудань зогсонгиб

«Дуратайб» гэхынь хүлеэнхэй.

Дулаахан гарынь адхангиб

Дурлаhан хүбүүн марганхай.

yүрэй сайтар инагни

yгэеэ хэлэхэеэ айшанхай.

Һайхан мэдэрэлhээ hогтонги

Һанаа ехээр алданхай.

Хүбэн сагаан манахан

Худан дээрэ унанхай.

Хүбүүн гэнтэ зүрхэлэн

Хоёр хасарым тааланхай.

Yүрэй толон hэмээхэн

Уула дээгүүр сасаранхай.

Улаан зyрхэд жэгтэйхэн -

Одоор досоомнай бадаранхай.

Нойрhоо дайда hэрижэ

Нюураа шүүдэрээр угаанхай.

Наран аалихан шагаажа

Наартайгаар бидэниие харанхай.

2011 оной апрелиин 9.