Буряад хэлэнэй hайндэр

Һурагшаднай амжалтатай хабаадаба

Намарай hайхан үеэр «Буряад хэлэнэй hайндэртэ» зорюулагдаhан хэмжээ ябуулганууд үнгэргэгдэдэг байна. Тэдэнэй тоодо манай ниислэл Улаан-Yдэдэ үнгэргэгдэhэн «Буряад хэлэнэй сахим hураха бэшэг» гэhэн электронно номоор мүрыcөөн болоно.

Тус мүрыcөөндэ манай аймагай дүрбэн үхибүүд хабаадаhан байна. Эдэ хэд бэ гэбэл, Балдуева Ханда, 1-дэхи классай hурагша, Чисаана hууринhаа, лицейн 6-дахи классай hурагша Гуруев Норбу, Хэжэнгын дунда hургуулиин 7-дохи классай Цырендоржиев Цырен, эхин классай Данзанов Арсалан гэгшэд.

Мүнөө жэлэй даабаринууд урда жэлнүүдэйхидэ орходоо ондоошье, бага зэргэ хүшэршэгшье байгаа. Урда жэлнүүдтэ ехэнхидээ нааданай аргаар үхибүүдэй мэдэсэ шалгагдадаг hаа, энэ жэл тэдэниие хэр зэргэ фонетикэ, морфологи, синтаксис гэhэн бүлэгүүдые мэдэхэ байhыень элирүүлхээр шанга туршалганууд угтажа байгаа.

Манай аймагай hурагшад hайн дүнгүүдые харуулжа, тус турнирта хабаадаа гэжэ хэлэлтэй.

Балдуева Ханда (багшань Нимаева Светлана Цыренжаповна) гэрэл толлолгын (презентаци) харалганда 2-дохи hуури эзэлжэ, нютаг оронойнгоо нэрэ хүндые hайн хамгаалба. Ханда нютагайнгаа мүргэлтэ газарнууд тухай hонирхолтой мэдээсэл суглуулжа, тэрэнэйнгээ гэрэл толлолго бүридхэжэ, унаган буряад хэлэн дээрээ жюриин гэшүүдэй урда ажалаа тоб байса дэлгэжэ үгөө.Тиихэдэ Арсалан Данзанов (багшань Дашиева Оюна Нимбуевна) шангай 3-дахи hуурида гараа. 3 шатаhаа бүридэhэн наадануудта Арсалан багшынгаа ударидалга доро тон hайн hорилго хэжэ, түргөөр, тон зүбөөр дабаануудые гаталжа, амжалта туйлаа. Норбу Гуруев, Цырен Цырендоржиев гэжэ хоер hүбэлгэн hонор, ухаансар бэрхэ хүбүүднай фонетикын, морфологиин, мүн тиихэдэ синтаксисай орон соогуур нилээдгүй hайн аяншалжа, шангай hуурида дyтэхэнэ үндэрлэбэ.

Шагналгын үедэ эгээл hонин баярта мэдээн манда дуулдаба. Энэ юун бэ гэхэдэ, манай аймагhаа республикын багшанарай дунда “Методическа заабаринууд, дурадхалнууд” гэhэн ехэ мүрысөөн-конкурсдо хабаадаhан лицейн буряад хэлэ бэшэгэй багша Любовь Сергеевна Ширапова шангай 3-дахи hуури эзэлбэ гэжэ соносхол дуулдажа, манай командын гэшүүд ехэтэ баярлаабди.

Буряадай Yндэhэтэнэй лицей-hургуули энэ хэмжээ ябуулгые үндэр хэмжээн доро эмхидхэдэг. Мүнөөшье аргагүй hонин концерт наада табижа сугларагшадые баясуулба.

«Буряад хэлэнэй сахим hураха бэшэг» гэhэн электронно номоор үхибүүд, ехэшүүлшье хаража, ехэл hонирхолтой мэдээсэл уншахын хажуугаар, элдэб наада наадажа, ухаагаа хурсадхаха, мэдэсэеэ үргэдхэхэ болоно.

Д. ДОРЖИЕВА. Хэжэнгын 1-дэхи дунда hургуулиин буряад хэлэ ба литературын багша.