Баяр еhолол

Жэлэй туршада хэhэн ажалайнгаа түлөө – шагнал

Майн 31-дэ В.С. Мункинай нэрэмжэтэ Хэжэнгын лицейдэ 4-дэхи жэлээ, нэгэшье таhалдуулангyйгөөр hуралсалай жэлэй үедэ ажал хүдэлмэри хэhэнэйнгээ түлөө туйлалтануудай «Амжалтын харгы замда» гэhэн мүрысөөн үнгэргэгдэбэ. Баяр еhололынь мүнөө ДЮСШ-гай байшанда боложо, ехэ зохидоор шэмэглэhэн талмайнь олон тоото сугларагшадай нюдэдые хужарлуулба.

Халуун альга ташалган доро лицейн hурагшадта - жэлэй мүрысөөнэй дүнгүүдээр эгээн ехэ баллнуудые абагшадта сертификадтайнь хамта эрдэм ном шудалхаhаа гадна, искусствэ, тоо бодолго болон хатар, спорт, урлал болон бусад зүйлнүүдээр шалгарhанайнь түлөө Хүндын алтан ба мүнгэн тэмдэгүүд барюулагдаhан байна.

Байгша оной «Эрхим hурагша» гэhэн мүрысөөндэ шалгарhан, 11-дэхи класс дүүргэжэ байhан Баатар Урбазаевта сертификадтай хамта Алтан тэмдэг зүүлгэгдээ, үшөө тиихэдэ тус лицей дүүргээд, Москва хотодо түрэл Хэжэнгэеэ суурхуулан ажалладаг Сергей Николаевич Ивановай өөрынь нэрэмжэтэ шангынь (10 мянган түх.) барюулагдаhан байха юм.

Алтан тэмдэгүүдтэ хүртэгшэд гэхэдэ, Баатар Урбазаев, Арюна Дугаржапова (хоюулан -11-дэхи класс), Сарана Цыренжапова (10-дахи класс), Мэргэн Сандитов (8-дахи класс) ба Даяана Дугарова (7-дохи класс).

Мүнгэндэ хүртэгшэд гэбэл, 11-дэхи классайхид - Соел Дашиев, Должид Цыдыпова, Солбон Шойропов, Цыпилма Галданова, Сарюна Батодариева, 10-дахи классай Очир Хабитуев Галсан Пордиев хоер, Анастасия Шатова (9-дэхи класс), Анастасия Садыкова Амина Санжиева хоер (8-дахи класс), Оюна Будаева (7-дохи класс), Алдар Санданов (6-дахи класс) ба 5-дахи классай hурагша Норбуу Гуруев.

Эрхим багшанарта баhал жэлэй дүнгүүдээр гурбан номинацинуудта шалгарhанайнь түлөө Дипломууд барюулагдаба: «Эдэбхитэй ажабайдалай үзэл» - С.Ц. Жанчикова, «Эрхим классна хүтэлбэрилэгшэ» - С.С. Базарханова, «Дүй дүршэл ба арга шадабари» - Т.Ц. Степанова.

Социальна политикын талаар аймагай гулваагай орлогшо И.И. Эрдынеева багша хадаа бага классай гурбан хүбүүдэй «Ерэхэ жэлдэ бидэ бүхы шангуудынь бултыень абахабди» гэжэ ехэ зохидоор хөөрэлдэжэ байхыень шэхэндээ хадуужа абаад, тэм-дэглэбэ.

Тэдэ хүбүүдтэ ерэхэ жэлдэ хамсыгаа шуун тон hайнаар эрдэм, номдоо hуралсахыень баhал амжалта хүсэебди! Эдэ олон эрхимүүдэй туйлалтануудтань бурхадаараа хамта даган баясаябди!

Бато-Цырен ДУГАРОВ.

Авторай дyрэ-зурагууд