Алдар Бальжинимаев

Олимпиин наадануудта чемпион болобо !

Һаяхана Сингапурта үнгэржэ байһан Олимпиин наадануудта Росси гүрэниие түлөөлжэ ошоһон, нютагаймнай залуу барилдаашан Алдар Бальжинимаев илалта дабажа гараба. 46 шэгнүүртэ Иранһаа гарбалтай Мехран Шейхиие 4:0 гээд шүүжэрхибэ.

Алдарай шэгнүүртэ бүхыдөө 6 шанга гэгшын тамиршад хабаадаа. Нэн түрүүн тэдэниие 2 бүлгэм болгожо таһалаа. Түрүүшын хоер уулзалгануудта буряад бүхэ Бальжинимаев Египтын Мухамед Абдельнаим болон армян Артак Ованесянтай барилдажа, хоюулыень 3:1 тоотойгоор шүүгээ. Хүрэл медальда Армениин Артак Ованесян хүртөө.

Буряадай, Россин болон Бүхэдэлхэйн СМИ-нүүд энэ һүүлэй мэдээсэл тараажа эхилэнхэйнүүд. Арсалан Болотовай хүмүүжүүлэгшэ Алдар Бальжинимаев амаргүйхэн илажа гараба гэхэһээ эхилээд, мүн энэ түүхэтэ мyрысooндэ нютагаа суурхуулан, бyхэдэлхэйн спортын тyyхэдэ нэрэеэ оруулба гэжэ олондо дуулгана.

Үнэхөөрөө, Алдар хара багаһаа бүхэ барилдаагаар һонирхожо байһаар, саашаа улам бэрхэ барилдаашан болоо бэлэй. Буряад Республикын залуушуулай суглуулагдамал командын ахамад тренер Владимир Пильчинов һанамжаараа «Хэжэнгэ» сонинтой хубаалдаба: «Буряадай залуу мүшэн Алдар бэрхэл юм ааб даа, ехэл омогорхоноб. Барилдахыень алдангүй бидэ тренернүд хараһан байнабди. Барилдаашан болоһоор, Алдар Европын, Россин чемпионадуудта 3 дахин призер болоһон, теэд мүнөө Олимпиин наадануудта илагша болобо гээшэ ааб даа. Ехэл баярланаб».

Һyyлэй үедэ буряад барилдаашадай илалтанууд соморхон болоошье. Теэд Хэжэнгын хүбүүн Алдар Бальжинимаевай амжалта туйлажа байһаниинь Буряадай, Хэжэнгын тамиршадта ехэ һургуули, мүн найдал болохо еһотой. бүхэ барилдаан манай нютагта бүришье урагшатайгаар дэмжэгдэхэ гээд найдагдана